ta gareki, k'anwa daya tamkar da dubu Allah ya barmu tare._


*Page ~50~*


_Kai gaskiya *masoyan banfi ƙarfin ta ba* ina matuƙar farin ciki daku, ba zan iya lissafi sunayen ku ba da ɗaiɗai, Amman in kinsan kina ciki, tau bansan irin godiyar da zanyi maku ba, ina ganin ruwan comment, kuna ƙayatar da Oum-Deedat. Nagode kwarai Allah ya saka maku da alkhairi, ya bar ƙauna, fatan za'a dinga faɗa mana kura kuran mu, saboda shi ɗan adam a ko'ina yake ajizi ne, tara yake bai cika goma ba_

*Gaisuwa ga ɗaukacin ƴan golden pen Writers Association, da bazarku nake taka rawa a ko'ina kuke a faɗin duniya. Allah ya ƙara haɗa kawunan mu, ya kauda idon maƙiya da mahassada. Ameen ya Rab*


°^^^^^^^^^^^^^^^^^^^^^^^^^^^^^°

Bacci fa mai daɗi na kwashe shi yau, har saida su khadee suka tada ni.

Ko bayan dai da na tashi walwalar bata bar fuska ta ba, haka nayi salla nayi wanka, da yake muna da lecture ɗin safe, tea kawai na iya kurɓa na fice ɗauke da tsantsar farin ciki.

Ina hanya ne wani text ɗin ya sake shigowa.

Ganin number ɗin jiya ce, ya sanya ni dakatawa daga tafiyar da nakeyi

A hankali na ƙara hasken waya ta, ta yanda zan iya ganin komai tar. Sannan na buɗe


_Abubuwa biyu ne suka assasa man barci mai daɗi a daren jiyan, amincewar Umma da Dad, yanzu kuma abu ɗaya ne zai raya wannan hasken ranar ta yau a gareni, ganin fuskar tauraruwar tawa, ki shirya ma zuwa na a koda yaushe. Take care with my love_

Cikin tsabar murmushi, har ƴar siririyar wushiryata ta bayyana, nake kallon wayar.

Saida na kuma tusa karanta abunda ya rubuta, sannan na samu bisa wani block na zauna, jikina duk ya mutu tsabar farin ciki.

Ta ina Sir Salim ya iya waɗannan kalaman tun tuni bai taɓa yi mani irin su ba sai yanzu.

Kenan Sir Salim ɗin zai dawo ayau kenan?

Cikin hanzari na kuma miƙewa na isa ga hall ɗin namu, Allah ma ya taimake ni lecture ɗita 8-10 ce sai kuma 12-2.

Ina da isassshen lokacin da zan iya komawa ɗakin ma har inyi wanka, don dai nasan sai marece yake zuwa shi.

Yau kam na fahimci lecture ɗin sosai, abokiyar zaman tawa mai suna Sumy itama kuwa ta fahimci hakan, har take tambaya ta minene sirrin fara'ar tawa ta yau, murmushi kawai nayi mata bance da ita komai ba.

Har muka gama kaf lecture ɗin tamu, sannan na nufo hostel.

Daf da zan ƙarasa hanyar da zata sada ni da ɗakin namu ne na hango tsayawar motar tashi.

To fa, ashe da wuri zai zo?

Kallon jiki na na sake yi, atamfa ce jikina ɗinkin riga da skirt, sai hijab ɗita kalar atamfar, Amman ba mai tsawo bace sosai, domin da kaɗan ta wuce hannuwa na.

Ba kwalliya ko laƙo a saman fuskar tawa, to saidai ba sabon abu bane a wajen Sir Salim ɗin ganina a haka, saboda ko lokacin da ya ganni ma yace yana sona, bai ganni da kwalliya a fuska ba.

Ja nayi na tsaya jikin wata bishiya haka mai ƴar inuwa.

Tafe yake cikin shadda saƙar gizna, na kula yana bala'n son shadda gizna, ba yabo ba fallasa yake nufo inda nake tsaye bayan ya kulle motar.

Ɗalibai sai gaishe shi suke yi, Amman da hannu kawai yake iya amsa masu.

Haka ya ƙara so inda nake tsaye, sadde da kaina ƙasa, ko ido ma na kasa bari mu haɗa, bansan dalili ba, yau Kunyar tashi da nake ji a jikina, ta linka wadda nake ji ada cen baya sau kusan goma.

Wai wannan shine wanda zan aura? Mijina uban ƴaƴana, kalaman da ya faɗa jiya ne suka sake dawo mani, sai kuma wanda ya turo mani ɗazu da safe.

Gefen hijab ɗita na jawo ina mai ɗan rufe fuska ta, haɗi da ɗan juyawa haka.

Da mamaki yake binta da kallo, Kaman ma fa bata san Abunda ke faruwa ba, muryarta ya tsinkayo tana mai gaishe shi.

"Sir Ina yini? Ya hanya? Ya su Ammi?"

Duk ta jero mashi tambayar, Amman fuskar ta har yanzu a rufe take, duk iya yanda zaiyi su haɗa idanu taƙi bashi wannan damar.

"Suna lafiya Suhan, Ammi tace a gaida mata ke sosai, ina so ne zamuyi wata magana, ina sauri ne zan wuce"

A ɗan mamakance na juyo ina mai kallon shi, to ai dole inyi mamaki, Suhan fa ya kira ni kai tsaye, kuma wai yana sauri, ba kasafai yake faɗa man haka ba, wani lokaci har nice ma zan ƙagara ya tafi saboda in samu inje in huta.

Gashi Sam wannan zaulayar, da walwalar da na saba gani a saman fuskar tashi, yanzu duk sun kau, babu ko ɗaya a cikin su.

Tsayuwa ta na ɗan gyara ina cewa "To Malam"

"Muje ko?" ya faɗa yana mai nuna mani wasu ƴan kujeru da take na zaman student saboda karatu, ƙarƙashin wata bishiya.

Kunya duk ta kama ni, yanzu a tsakiyar makaranta zamu zauna mu tattauna ɗin?

Saidai ban mashi musu ba na shiga bin bayan shi.

Zama yayi, yana mai ɗan tura mani kujera ɗan nesa kaɗan dashi.

Ja nayi na zauna, ina mai tattara dukkanin natsuwa ta a kanshi.

Ganin hakan, sai bai ɓata ma kanshi lokaci ba ya shiga kora mani jawabi.

"Watau Suhan iyaye na sunje gidan ku, sun samu mahaifan ki, Naji daɗin yanda komai ya faru, basu yi wani ɓoye ɓoye ba suka shaida masu cewa sunyi maki miji, saboda haka suna mana addu'a da fatan alkhairi..."

A firgice na ɗago ina mai kallon shi, lokaci guda kuma ina mai ƙoƙarin tashi daga zaunen da nake, ji nayi kaman an buga mani guduma a tsakar kai.

Da hannu yayi mani alamun da in dakata, sannan yace" koma ki zauna, ai ban gama ba"

"a zahirin gaskiya Suhan na soki, na ƙaunace ki, saidai ina ganin hakan shine yafi alkhairi, domin dama kullum zaɓin alkhairin muke addu'a, banso rabuwa dake a wannan yanayn ba, saidai bana da yanda zanyi, bana son shiga tsakanin ki da mahaifan ki, bana kuma so a dalili na ki bijire ma umurnn su, don haka kiyi biyayya, indai nine Salim, to *Na anye maganar aure na dake* saidai bana fata hakan ya shafi zumuncn mu, ko da yaushe kike buƙatar taimako a makarantar nan, ƙofa a buɗe take, kizo ki same ni, insha Allah zanyi ƙoƙarin ganin na magance maki ita, don Allah Suhan ki amshi zaɓin iyayen ki, wata ƙila shine mafi Alkhairi a gare ki. Ammi tace in bata ke a waya zakuyi magana"

Ya faɗa yana mai zaro wayar shi, ya shiga kiran layin Ammi ɗin.

Nidai kawai zaune nake kaman mutum mutumi, to kenan ba shine ya turo mani text ba jiya, kenan wanda suka zaɓa mani ne? To ta yaya? Ta ina ya samu layi na?

Cen na tsinkayo muryar shi suna gaisawa da Ammi ɗin, sai kuma ya shiga cewa "to Ammi gata"

A hankali na miƙa hannu na ina mai amsa na kara a kunne, sai kuma na fashe da kuka, shiru Ammi tayi tana mai saurare na, saida nayi mai isa ta, Allah ya soni ma an shiga lecture ɗin 2,ɗaliban ƴan tsuraru ne suke wucewa, suna ɗaga ma Sir Salim ɗin hannu, wanda shi hankalin shi ma Sam baya kaiwa kansu.

Sai da nayi mai isa ta, sannan na tsagaita, bansan ko kukan menene ba, idanuna sunyi jawur, haka fuska ta, kaman wadda aka faffalawa mari, abun ka da farar fata.

"Ya isa hakanan Suhana ta, yi shiru goge hawayen muyi magana"

Ammi ɗin wadda take zaune a tanƙamemen falon nata bisa wata sofa mai kyau, ta faɗa.

Share hawayen nayi, ina mai jan majina a hankali, sai kuma nace "Ammi ina yini?" cikin karyayyar murya da tasha kuka.

Saida ta ɗan runtse idanun nata, kukan nawa ya taɓa mata har cikin zuciya, wannan ke tabbatar mata da cewa Salim ɗin ya faɗa man komai, kuma hakan ya ƙara tabbatar mata da nima ina son yaron nata.

"Suhan haƙuri zakuyi ku dukanku, ƙaddara ta riga fata, dama cen Allah bai rubuta ke matar Salim bace, Allah ya sani mun soki, mun ƙaunaceki da zuciya ɗaya, tin jiya naso in kira ki, nayi tunanin gara ki fara ji daga bakin shi, kinsan zuciya bata da ƙashi, mun san ba laifi ki bane, haka kuma mun san ba yaudara bace, ke ɗiya ta ce Suhan, ko baki auri yaro na ba, inaso ki ɗauke ni a matsayin uwa, zan zame maki gata Suhan, zan zame maki kaman Umman ki insha Allahu, a koda yaushe muna tare dake a rayuwa, yanzu abunda nake so dake shine, ki amshi zaɓin iyayen ki, kada ki sake kice zaki bijire masu, saboda soyayya, kada ki sake ki rabu da iyayen ki akan ɗa namiji, su kansu wani lokacin basa da tabbas, koda yake ɗanɗa na, ba zan iya bada shedar shi ba 100% saboda batare dashi nake kwana nake tashi ba, saidai zan iya bada shaidar wasu daga cikin halayen shi, kasancewa ta uwa a gareshi, uwa kuma mai kula da al'amurran yaran ta. Suhan insha Allahu ba zaki yi nadamar zaɓin iyayen naki ba. Don haka nake baki shawarar da kibi Allah kibi iyayen ki, kiyi haƙuri kibar kuka, Allah zai baki wanda yafi Salim komai da izinin Allah"

Ta tsagaita cikin tausasawa, sai kuma itama zuciyar ta ta karye, bata bari na fahimci haka ba, ta shiga ƙara kwantar mani da hankali, har saida taji ina mai ɗan sauke ajiyar zuciya cikin wayar a hankali a hankali.

Mun ɗau tsawon lokaci tana bani baki, har saida na gaji da riƙe wayar a kunne na.

Sallama tayi mani, bayan na shiga zuba mata godiya, ina ƙaunar matar har cikin zuciya ta, baya ga Ummata banga matar da take mani ƙauna irin wanna ba, bayan bamu haɗa komai da ita ba, sai soyayya da ɗanɗan nata.

Cewa tayi in bashi wayar.

Miƙa mashi nayi, ina mai ƙara share hawayen da har yanzu sun kasa tsayawa a fuskar tawa.

Amsa yayi shima, kamar ya zuba kuka, ganina da yayi gaban shi, gashi ina kukan rabuwa dashi, hakan sai ya ƙara katse mashi jijiyoyi, ji yake kaman yace bai yarda ba, ji yake kaman ya tashi yaje gidan namu da kanshi ya samu Umman tawa, duk da dai ya san iyayen nashi ba zasuyi mashi ƙarya ba.

Shima sun ɗau tsawon wani lokaci suna waya sannan ya katse wayar yana mai maidata aljihu.

Yanzu na ƙara tabbatar wa, saƙon jiya da na yau ba shine ya turo mani ba.

*Zaɓin iyaye na* shine ya turo mani saƙon kenan, wanda zan iya kiran shi da *ɓoyayyen masoyi*

Hankalina na maida kanshi, ganin ya miƙe saboda ɗalibai da suka fara fitowa daga lecture suna kallon mu.

"Suhan zan tafi, Allah ya haɗa kowa da rabon shi na Alkhairi, don Allah ki ɗauke ni a matsayin yayanki uwa ɗaya uba ɗaya a makarantar nan, bana so ki ɗora ma kanki laifi da damuwa har hakan ya shafi karatun naki. Ina sonki har cikin raina" yana gama faɗar haka ya juya ya nufi motar tashi,ba tare da ya bani damar cewa wani abu ba.

Saidai ya kasa tashin motar tin bayan shigar shi ciki.

Kanshi ya ɗora saman steary, wani irin ƙululun abu ne yake jin yana mashi sama da ƙasa a cikin maƙoshi, ɓacin rai zalla, sai yanzu yake jin wasu ɓoyayyu hawayen soyayya na tsattsafowa daga kwarmin idanun nashi.

Yana iya hango ta, ita kanta har yanzu ta kasa tashi daga wurin, lokaci zuwa lokaci takan sanya hijabin ta tana share kwallar ta, da yake university ce, saidai a kalle ta a ɗauke kai, waɗanda suke tsaye suna kallo na basu da yawa.

Ganin an fara taruwa ne ya sanya ni miƙewa jiki a sanyaye da niyyar barin wurin.

Wasu jibga jibgan mktooci ne suka yo shigar burgu zuwa harabar makarantar a guje, ƙurar su kawai kake iya hangowa, saidai daf da zasuyi parking sai kuma suka rage gudun su, zuwa a hankali a hankali.

Ban iya cewa ga sunan motocin, saidai ni kaina nasan a irin fina-finan ƙetare ne kawai nake ganin irin su.

Motoci uku ne, guda biyu watau ta gaban da ta bayan dukan su farare ne sal, sai kuma ta tsakiyan da ta kasance ɓaka wuluk, a tare suka yi parking a kuma jere, da gudu naga wasu irin bodyguard suna fitowa zuwa jikin baƙar motar domin su ba mai fitowa daga ciki kariya da kuma tsaro.

Sai wasu mutane masu saye da rigunan fadawa suma riƙe da bulalai irin na dorina, sai zare idanu suke yi.

Kallo fa ya koma sama.

Anyi cirko cirko zaman jiran wanda zai fito daga cikin wannan motar da ta riga ta tafi da imanin kowa dake faɗin makarantar.

Sai da na kusa faɗuwa, gani wani bodyguard guɗa ɗaya, da hannun shi ke riƙe da ƴar bindiga ya sanya hannun shi ya buɗe bayan motar.

Ganin wanda ya fito daga cikin motar ne, ya sanya ni ƙara wara idanu na akan shi.

*ya Ameen* na furta cen ƙasan maƙoshi, ina mai ƙara ƙwalalo idanu na, kaman zasu faɗo ƙasa, lokaci guda litattafan hannuna suka sulale zuwa ƙasa.

Sanye yake cikin wasu irin baƙaƙen suit, hatta da takalmin da yake ƙafar shi cover shoes baƙaƙe ne, sai ɗaukar idanu suke yi da walwali.

Fuskar shi Sanye take da wani irin baƙin Sun Glass, da baka iya hangen kwayar idanun nashi.

Hakan ce taba farar fatar shi daman sheƙi da walwali.

Gashin kanshi kwance yake luf luf,har zuwa saman wuyan shi, duk da kan nashi babu aski saidai gyaran fuska, kai in ka kalle shi sai kace ya haɗa iri da fararen Larabawa ko kuma indiyawa.

Kai tsaye idanun shi bisa ni suka sauka, hakan ce ta bashi damar fara takowa a hankali kuma cikin ɗan sauri sauri da zafin nama irin na cikakken namiji.


"wow, wow, Al'ameen dambulan, yariman matasa"

Abunda naji wasu ƴan mata dake kusa dani sun faɗa kenan, suna mai zuba mashi dukkanin idanun su.

Shima Sir Salim dake zaune cikin mota, y kasa tuƙawa balle ya bar wurin, hankalin shi ne ya kai kan motocin tin shigowar su, gabaki ɗaya an rubuta *Yariman Matasa* a jikin number ɗin motocin.

Kallon shi ya sake kaiwa inda nake zaune, domin ko ba komai ya san wurina suka zo, tinda ƴan gidan mu ne.

Ga mamakin shi nima tsaye nake, ga litattafai na a ƙasa yashe, har kai lokacin da Al'ameen ɗin ke takawa yana nufar inda nake tsaye, watau inda Sir Salim ɗin ya barni zaune.

Bodyguard guda biyu ke biye dashi, sai fadawan da suke biye dashi da ɗan guntun gudun shi, da niyyar su isa su gyara mashi wurin da zai zauna, hannun ɗaya daga ciki riƙe da wata irin kujera da ake naɗewa kaman keke mai masifar kyau.

Har yanzu dai da kallo nake binshi, bakina a sake, kaman gaula, ya koma mani Ya Ameen ɗin da na sani tin cen baya.

Wannan comvoy ɗin duk na menene? Ƙila hanya ce ta kawo shi, shine ya biyo ya ganni, to amman duka yaushe ya kawo ni? Duka yaushe muka rabu?

Bansan ya ƙara so inda nake tsaye ba, sai ƙamshin mayataccen turaren shi Naji a kusa dani.

Fuskar nan ba yabo ba fallasa, duk da har yanzu tana ƙunshe cikin Glass ne.

Kujerar suka warware haɗi da ajiye mashi suna mai matsar da tawa kusa da wadda suka ajiye.

Da hannu ya dakatar dasu, yana mai faɗin "you can go"

Baya sukayi su duka, suna mai komawa jikin motocin, hadda dogarawan kuwa.

Sai kuma abun ya ƙara ba student mamaki, ai su duk a tunanin su wajen VC yazo, sai kuma suka ga ya dakata a wajen da nake tsaye.

Su kuma sun san alaƙa ta da Sir Salim, kuma ga shi cen tsaye bakin motar shi, yana iya hangen dukkan abunda ke faruwa.

Ai sai suka zuba mana idanu, kunsan ƴan makaranta da gulma, gashi kusan ƙarfe huɗu duk sun firfito.

Hatta dai da su Raihana da Khadeejan tsaye suke suma sun zuba ma sarautr Allah idanu.

Kujerar da suka ajiye mashi, ita ya ɗauka ya ajiye mani, sannan ya duƙa ya shiga tattara mani litattafai na da suke ƙasa, ya aza su bisa ɗan table ɗin, yana mai jawo kujerar da suka ajiye mani ya zauna.

"Zauna mana malama, ko Soja ce ban sani ba? Kina wani kallo na kaman kinga baƙon ki"

Ya faɗa cikin basarwa, kaman ba shine yayi maganar ba.

Banda zaɓi illa zaman.

Kaman sauna dai, haka kuma nake kallon shi, ga idanuna da sukayi luhu-luhu tsabar kuka.

Wayar shi ya zaro yana mai latsawa, kaman ya manta dani a wajen.

"ina yini?

Na furta a hankali kaman wadda bata son yin maganar.

Bai bar latsa wayar ba, haka ma bai amsa mani gaisuwar da nayi mashi ba.

Sai cen ne naji yace " ai na ɗauka baki Iya gaisuwa ba"

Da mamaki nake kallon shi, au Shiyasa bai amsa mani ba?

Sadda kaina ƙasa nayi ina mai ɗan sakin ajiyar zuciya.

Ganin ba zan tanka ba, sai ya ajiye wayar bisa ɗan teburin dake gaban mu. Sannan ya maido hankalin shi a kaina.

"Bakiga text ɗina ba jiya da yau?" ya furta yana mai zare Glass ɗin idanun shi.

"Na gani Yaya"

Na faɗa nima a hankali.

"Meyasa baki yi mani reply ba? Ko bani da amsa ne? Ke yaushe ne zaki bar ƙauyanci ne?"

Ya faɗa still shima dai kaman ba shine yayi maganar ba.

Ɗan kallon inda student suke tsaye nayi, kunya duk ta baibayeni.

Sai kuma na maida kallo na kan Sir Salim